صياد....بقلم الشاعر دياب محمود حسن

صياد
........كلمات أ / دياب محمود حسن
فى عز البرد
فى ليل وصمت
فى دنيا ضلمة
اسأل عنى تلقانى
من بر لبر
كر وفر
بينى وبين دنيا
قاسية معاندانى
مركبى ماشية وانا فيها
الراكب وانا فيها المعداوى
خايف ألِمْ شباكى
أرجع ألاقى عيلي باكى
ومستنى أهلّْ عليهم بأسماكى
امسح دموع واداوى الجوع
أشد بإيدى بنوتى واقول
يا حلوة محلاكى
اصرخ:يا بحر
ليه قاسي
ليل طويل على ميّك
انا ماشى
مش عايز لؤلؤ ولا مرجان
ولا املى بالدهب كيسي
انا عايز الستر
احمى أهلى من الحرمان
يا بحر ليه بخلان
ليه بتيجى ع الغلبان
يا بحر ليه علىّ تقلان
ما بطنك بالسمك مليان
يوم تدينى يكفى بيوت
ويوم تدينى بالشلوت
من بعيد صرخت سمكة
صوتها حديد
يا صياد
البحر بيقولك
الرزق مش بالإيد
ده كلام من زمان مش جديد
ارضى بالمقسوم تعيش سعيد
يا صياد
اجري جري الوحوش
غير رزقك مش هتحوش