ارمي السيجارة...بقلم الشاعر دياب محمود حسن

ارمى السيجارة
......كلمات أ / دياب محمود حسن
خلاص وافقت تبقى عبد
ومستعبداك سيجارة
وافقت تبقى هى الأمير
وانت الإمارة
يا راجل دا انت بتشوفها
بعينك وهى بتموت الأف
بعد ما تخرب بيتهم ويروحوا
فى غارة
افتكر زمان لمَّا كنت بتشيل
الحجارة
وتقدر تبنى على كتفك عمارة
راحت فين صحتك 
ازاي وافقت تبيعها هى وفلوسك
وترضى بالخسارة
طب قوم شم بقك واسأل نفسك راحت
فين الريحة الحلوة ريحة الطهارة
بالله عليك وانت ماشى معاها
شفت فى طريق الخطر كام إشارة
واللا انت بتطنش وتغمض عنيك
وتعمل مش شايف تكونشي فاكر
إن الهروب من المشكلة شطارة
قوم شوف لك حل وارسي مع
نفسك ع العبارة
يا راجل قوم ارميها دا موضوع
مش عايز استشارة
إسمع كلامى ومن بكرة مدخنش
خلي يوم يعدى عليك وصدرك
من نارها ميولعش
خلى يوم يعدى عليك ومن الكحة
متتألمش
قوم شوف البيت اللي مكملش
شوف بنتك اللي كبرت ولسه
مجهزتهاش شوف الواد اللي
متعلمش
الناس كلها بتتطور وبتطلع لقدام
وانت واقف مكانك مبتتحركش
لو فضَّلت السيجارة على إبنك
وبنتك يبقي انت لامؤاخذة راجل
مابتفهمش
واقولك على مفاجأة قبل ماتمشي
أول واحد إداك سيجارة كان بيكرهك
وما بيحبكشى