صرخة أم...بقلم الشاعر دياب محمود حسن

صرخة أم
................. كلمات أ / دياب محمود حسن
رمت ابنها جنب
الحيط ! وصرخت بأعلى
صوت !!!
صرخة عالية أصلها جاية 
بعد فترة من السكوت
صرخة الألم ال دابح قلبها
حزنه المكبوت !
الحقونى الحقو عادل ضنايا
بين ايديا راح يموت !
الحقو الطفل ال لسه ممشاش !
و لا حتى سنة من سنين 
عمره عاش !
تلات ليالى على ايديا 
انا شايلاه !
ألف بيه ع الدكاترة و يقولوا 
ليه فات منك ميعاد دواه !
هو انا لاقياه !
و لا حتى ابوه معاه !
خدوه ،عالجوه ،ارجوكم
انقذوه !
و انا فى زحمة الدنيا راح
اتوه !
مش مهم تعرفوه مين امه
مين ابوه !
المهم الواد يعيش !
المهم يلاقى لقمة ،يلاقى هدمة
او يلاقى مكان يعيش !
مش مهم قلبي جوه صدرى 
ينفطر على ضنايا !
مش مهم ابوه يصرخ ف و شى
او حتى يجرى بشومته يا ناس
ورايا !
المهم الواد يعيش !
قول لى يا اخويا يا طبيب !!!
يا اللى عندك بدال الألف
ميِّة !
ناقصك ايه علشان تظبط روشتتك مع
صيدلية !
شوفو الدوا ال كان زمان بقرش !
و كنت اجيبه وارمى نصه فى 
الزبالة !
ا نهارده جاى يقولى الصيدلى وفري
فلوسك يا خالة !
دى يا دوب تشترى حبة واحدة 
من شريط !
دا الدوا من شهور مش مبطل
تنطيط !
القزازة ام عشرة من شهور 
بقيت بميِّة !
و كل يوم صنف يغلى و المكاسب
للحرمية !
والطبيب صاحب العلام رامى حب
الناس وراه !
بقي يطلب منا ندفع و الجشع يا
ناس عماه !
ازاى الاقى يا خلق سكة لما صاحب
العلم تاه !
متلوموش يا ناس علينا  لو  رمى
العاجز ضناه !