العيد ده مش عيدي... بقلم الشاعر وحيد محروس خليل

العيد دا مش عيدي 

قالوا جانا العيد 
أنا قولت فين أراضيه 
بصيت أنا من بعيد 
لا شوفته ولا حتى لاقيه 
قالوا ياعيني عليك 
قلبك مالوش في الفرح 
والدنيا قاسية عليك 
سقياك مرار وجرح 
قولت إزاي أفرح
وأنا نفسي مكسورة 
عايش غريب بين ناسي 
وإتلخبطت الصورة 
الكل بيقول يانفسي 
والغلطة بقت بالفورة 
ماتت فينا المشاعر 
وضاع بينا الحنين 
والغريب في الزمان دا 
بقى الخلاف يدوم سنين 
لانافع معانا قرابة 
ولا حتى شرع ودين 
وجايين تقولولي عيد 
والدم إللي ف وريدي 
العيد دا مش عيدي 
       *****
وكمان شايف بلادي 
بقت كل بلد في وادي 
وياما قولنا إتحدوا 
ولا حياة لمن تنادي 
بقينا عايشين في حروب 
ونزاع ما بينتهيش 
دا حلمنا بسيط يدوب 
عايزين نعرف نعيش 
لكن أعيش إزاي 
وأنا بلادي مقهورة 
ورخيصة ملهاش تمن 
وبالضعف مشهورة 
فين سوريا وفين اليمن 
عايشين سنين في صراع 
والأقصى عمال بيئن 
بيعاني من الضياع 
معقول هيعود الزمن 
ومجدنا   إللي  ضاع 
ولا هنعيش نعاني المحن 
مابين إللي غدر وإللي باع 
وتفضل حياتنا شجن 
عايشين العمر في خداع 
وجايين تقولولي عيد 
لا بخاطري ولا بإيدي 
والدم إللي ف وريدي 
العيد دا مش عيدي
        *****
وإزاي أفرح بالعيد 
وأنا شايف دم شهيد 
وكل  يوم  ضحايا 
على إيد سفاح جديد 
بقت أطفال بيتيتم 
وستات بتترمل 
وأمهات قلوبها بتتحرق 
كاوياها دموعها على الوليد 
وجايين تقولولي عيد 
لا بخاطري ولا بإيدي 
والدم إللي ف وريدي 
العيد  دا  مش  عيدي 

بقلمى / الشاعر وحيد محروس خليل