ملح الأرض..بقلم الشاعر دياب محمود حسن

ملح الأرض
.........كلمات أ / دياب محمود حسن
ارسم يا زمان على وشى
زى ما انت عايز تجاعيد
فاكرنى هبص فى مرايا
فاكرنى هقعد أقول وأعيد
متحلمشى انا طول ما فىّ نفس
عمرى ما ميّل وابوس الإيد
انا هكتب بإيدى السمرا على
وشك يا زمن احلى نشيد
انا بالكفاح هنام مرتاح
ارضي هفضل حاميها
اموت واندفن فيها وبعرقى
وشقايا هفضل ارويها
هتفضل شايف فى عيونى
البصة العنيدة
ومهما كنت شايل حمول
دمعتى هتفضل بعيدة
دا انا يا ما عدت عليّ
اجيال مسمعتشى منى
ولا تنهيدة
الوش كرمش بس العزيمة
شديدة
كل سنين الشقا مرسومة فى
ملامحى
ولونى بقى زى لون قمحى
طول السنة شقيان وبييجى 
الحصاد يفرحنى
يا دنيا مهما فتشتى فى ضلوعى
مش هتعرفى تكشفى جرحى
الأرض طول النهار تضحكلى
وتقولى: تعرف يا اسمر والله
انت ملحى